जनकपुरधाम, फागुन ३० : धनुषाको क्षिरेश्वरनाथ नगरापलिका–३ स्थित रमदैयामा होलिमा अत्यधिक मदिरा पिउँदा मृत्यु हुनेको संख्या ६ पुगेको छ । मदिरा सेवनले सिकिस्त तीन जनाको अवस्था गम्भीर रहेको छ । मदिरा सेवन गरेका ३ जनाको बुधबार दिउँसो र २ जनाको बिहीबार राति मृत्यु भएको इलाका प्रहरी कार्यालय सखुवा महेन्द्रनगरका प्रहरी निरीक्षक पप्पु नायकले जानकारी दिए । अर्का एकजनाको भने तीन दिन अघि नै मृत्यु भएको स्थानीयले बताएका छन् ।
मृत्यु हुनेमा स्थानीय ४० वर्षीय ब्रमहेव यादव, ३५ वर्षीय विभाद मण्डल, ६० वर्षीय गुदरी महरा, रामनारायण महरा र राजु महरा छन् । मदिरा पिउँदा सिकिस्त बिरामी परेका ईन्द्रजीत सदाको चिन्ताजनक अवस्थामा धरानमा उपचार भइरहेको छ ।
स्थानीयले उनको पनि मृत्यु भइसकेको दाबी गरेका छन् । तर, प्रहरीले भने यसको पुष्टि गरेको छैन । उनको अवस्था चिन्ताजनक रहेपनि मृत्युको खबर आइनसकेको प्रहरी निरीक्षक पप्पु नायकले बताए । परवाहाका वर्ष ३५ का गिरिजानन्द झाको समेत मृत्यु भएको छ ।
यद्यपि उपचारको क्रममा प्रादेशिक अस्पताल जनकपुरमा परवाहाका गिरिजानन्द झाको मदिरा सेवन वा अन्य कारणले मृत्यु भएको भन्ने कुराको अनुसन्धान भइरहेको जिल्ला प्रहरी कार्यालय धनुषाले जनाएको छ ।
सिकिस्त बिरामी परेको स्थानीय सत्रुधन मण्डल र राम इश्वर महराको जानकी मेडिकल शिक्षण अस्पतालको आइसियुमा उपचार भइरहेको छ । मृतक पाँच जनाको शव पोष्टमार्मका लागि प्रादेशिक अस्पताल जनकपुरमा राखिएको छ ।
मदिरा सेवनबाट एकै गाउँका ६ जनाको मृत्यु भएपछि रमदैया गाउँ शोकमा डुबेको छ । घटनाको थप अनुसन्धान भइरहेको प्रहरी निरीक्षक पप्पु नायकले जानकारी दिए ।
युवतीको शव पोखरीमा तैरिरहेको अवस्थामा भेटियो
यसै बिच जनकपुरमा एकाविहानै पोखरीमा तैरिरहेको अवस्थामा एक युवतीको शव फेला परेको छ । जनकपुरधाम उपमहानगरपालिका–६ स्थित गोरधोइ पोखरीमा २५ वर्षीया रोशनी खातुनको शव फेला परेको प्रहरीले जनाएको छ । विहानै मर्निङ वाकमा निस्केका स्थानीयले युवतीको लाश देखेपछि प्रहरीलाई खबर गरेका थिए । स्थानीयका अनुसार ती युवति कपडा पसल सँचालन गर्दै आएकी थिइन् । प्रहरीले यस घटनाको विषयमामा समेत अनुसन्धान थालेको बताएका छन् ।
