संजय साह
जनकपुरधाम, फागुन २६ : प्रदेश २ का मुख्यमन्त्री लालबाबु राउत यस वर्षको महामुर्ख घोषित भएका छन् । होलीको अवसरमा हरेक वर्ष जनकपुरधामको जानकी मन्दिर प्राङ्गणमा आयोजना हुने महामुर्ख सम्मेलनले यस वर्षको महामुर्खको उपाधि मुख्यमन्त्री राउतलाई प्रदान गरेको छ । संघिय सरकारसंगको खिचातानी र असहयोगका बाबजुद पनि बेटी पढाउ बेटी बचाउ सहितका विभिन्न महत्वपुर्ण कार्यक्रमहरु ल्याएर प्रतिकुल प्रस्थितीका बिच पनि चर्चामा रहने काम कुनै पनि महामुर्खले मात्र गर्न सक्ने भन्दै यो सम्मान उनलाई प्रदान गरिएको आयोजक मिथिला नाटयकला परिषदले जनाएको छ ।

मैथली, भोजपुरी, हिन्दी र अंग्रेजी सहितका भाषाहरुको जानकार समेत भन्दै मुख्यमन्त्री राउतलाई महामुर्खको उपाधि प्रदान गरिएको हो । उनलाई फर्सीको टोपी र सखरखण्डको माला लगाएर सम्मान गरिएको छ । मुख्यमन्त्री राउत आफु जिवनमा पहिलो पटक यस्तो कार्यक्रममा सहभागि भएको भन्दै सभ्य तरिकाले पनि मज्जाले बेज्जत र मजाकपुर्ण सम्मान मिथिलावासीले मात्र गर्न सक्ने टिप्पनी गरेका छन् । मिथिलाको संस्कृती, संस्कार र सभ्यताको जोडा नरहेको बताउदै उनले होलीको शुभकामना व्यतm गरेका छन् । साथै समाजका लागि विभिन्न क्षेत्रमा योगदान दिएका युवाहरु तथा प्रदेश सभा सदस्य गरि विभिन्न अन्य १३ जनालाई विभिन्न शिर्षकको मुर्खको उपाधिले सम्मानित गरिएको छ ।
यस अघि २०७५ सालको महामुर्ख जनकपुरधाम उपमहानगरपालिकाका प्रमुख लालकिशोर साह भएका थिए । विभिन्न शिर्षकमा मुर्खको उपाधि पाउनेहरुमा प्रदेशसभा सदस्य परमेश्वर साह, मनिष सुमन, रामअशिष यादव, रामचन्द्र मण्डल, जनकपुरधाम उपमहानगरपालिकाकी उपप्रमुख रिता झा सहितका रहेका छन् । उनीहरुलाई क्रमश भभकौवा, पटमुर्ख, हराशंख, सिलौट शंकर तथा टुनमुसरी सहितको उपाधिले विभिन्न व्यङ्गात्मक मालाहरु लगाएर सम्मान गरिएको छ ।

साथै नेता रोशन जनकपुरीलाई वेलगोबना, वृहतर जनकपुरधाम क्षेत्र परिषदका कार्यकारी निर्देशक बलराम ठाकुरलाई खेसारीलाल, पिपरा गाँउपालिकाका अध्यक्षमा निर्वाचित विक्रम चौधरीलाई खाकसुरत, शिक्षक बलराम साहलाई बज्रकिट, नेतृ पुनम झालाई अदलबदली, मैथली विकास कोषका अध्यक्ष जिबनाथ चौधरीलाई घरघुसना, पत्रकार अनिल मिश्रलाई लोढाकुरहरि र युवा शुसिल कर्णलाई बंशकुरहरि मानपदवीले सम्मान गरिएको छ । उनीहरुलाई भिन्डी, भान्टा, आलु, खुर्सानी, केसौर, कटहर सहितको माला लगाएर सम्मान गरिएको थियो । सो समारोहमा विभिन्न कवि तथा साहित्यकारहरुले होली तथा जोगिरा सम्बन्धित प्रस्तुतीहरु प्रस्तुत गरेका थिए । समारोहमा कोरोनावाट सर्तकता र बचाउका लागि मास्क वितरण गरिएको थियो भने रंग अविर लगाउने कार्यक्रम स्थगित गरिएको छ ।