इलाम : गोलरक्षक देव लिम्बूको उत्कृष्ट प्रर्दशनका कारण पहिलोपटक आयोजक माईभ्याली फुटबल क्लब इलाममा जारी छैटौँ संस्करणको माईभ्याली गोल्डकपको फाइनलमा प्रवेश गरेको छ। देवले पेनाल्टी सुटआउटमा सन्तोष तामाङको बल बचाएका थिए।
जुन घरेलु टिमका लागी फाइनल पुग्ने अवसर बन्यो । निर्धारित ९० मिनेटमा दुवै टिमबाट १/१ भएको थियो। त्यसपछि थपिएको २० मिनेटमा गोल हुन नसकेपछि निर्णयका लागि पेनाल्टी सुटआउट रोजिएको थियो। पेनाल्टी सुटआउटमा आयोजकका प्रिजन तामाङ, पासाङ तामाङ र इला क्षेत्रीले गोल गरेका थिए। कप्तान विशाल तामाङको प्रहार फ्रेममा पर्न सकेन। शरण बस्नेतको प्रहार आर्मीका गोलरक्षक विवश चौधरीले बचाएका थिए।
आर्मीका दीपक गुरुङ, राजिव गुरुङ र दीप लामाको प्रहार गोलमा परिणत हुँदा विकाश तामाङको प्रहार बाहिरिएको थियो। टाइव्रेकरमा ३/३ गोल भएपछि सडन डेथबाट निर्णय गरिएको थियो। सडनडेथमा आयोजकका लागी गोलरक्षक देव र अफ्रिकन खेलाडी एन्ड्रे थिएरी बियाकले गोल गरेका थिए।
आर्मीका राजु आलेको प्रहारले जाली चुम्दा भरत चौधरीको प्रहार आकासिएपछि आयोजक घरेलु मैदानमा पहिलो पटक उपाधि होडमा प्रवेश गर्यो। खेलको ३४औँ मिनेट आयोजकले सुरुवाती अग्रता लिएको थियो। आर्मीका गोलरक्षक विवश चौधरी विट भइसकेको अवस्थामा करन राईले आयोजकका लागी पहिलो गोल गरे।
त्यसको ७ मिनेट नबित्दै आर्मीले खेल बराबरीमा ल्यायो। आयोजकका एन्ड्रे थिएरी बियाकले आर्मीका विवेक बस्नेतलाई फाउल हानेपछि पाएको फ्रिकिकको अवसरलाई सन्तोष तामाङले सीधै जाली चुमाउँदै खेल बराबरीमा ल्याए। खेलको ९६औँ मिनेटमा आर्मी १० खेलाडीमा सीमित बन्यो। विवेक बस्नेत दोहोरो पहेलो कार्ड खाँदै मैदान बाहिरिएपछि आर्मी दबाबमा परेको थियो। खेलको २८औँ मिनेटमा आयोजकका शरण बस्नेतलाई फाउल हानेर पहिलो कार्ड पाएका विवेकले पुनः ९६ औँ मिनेटमा शरणलाई नै फाउल गरेपछि दोहोरो कार्ड पाए। खेलमा दुवै टिमले केही राम्रा मुभहरूलाई सदुपयोग गर्न सकेनन्।
१६औँ मिनेटमा आयोजकका मनकुमार राईको प्रहार सहजै आर्मीका गोलरक्षकले नियन्त्रणमा लिए। १८औँ मिनेटमा आर्मीका विकाश तामाङले गोलरक्षक विट भइसकेको अवस्थामा गोललाइनबाट बल बचाए। ७१औँ मिनेटमा मनकुमारको प्रहार आकाशियो। खेलको २५औँ मिनेटमा आर्मीका विवेक बस्नेतको प्रहारलाई आयोजकका गोलरक्षक देव लिम्बुले पञ्च गर्दै बचाए। ३१औँ मिनेटमा आर्मीका टंक बस्नेतले पेनाल्टी एरियाभित्रबाट गरेको प्रहारलाई गोलरक्षक देवले मुस्किलले बचाए। ८७औँ मिनेटमा विवेक बस्नेतले रिवाउन्डमा पाएको अवसरलाई आयोजकका गोलरक्षक देवले क्लियर गरिदिए। खेलपछि प्रतिक्रिया दिँदै आर्मीका प्रशिक्षक नविन न्यौपानेले ५०/५० को अवस्थामा रहेको खेलमा आयोजकका गोलरक्षकले उत्कृष्ट प्रर्दशन गरेपछि पराजित बनेको बताए। उनले पहिलो हाफको तुलनामा दोश्रो हाफमा उत्कृष्ट खेले पनि पाएको अवसरलाई सदुपयोग गर्न नसकेको बताए।
‘मिस कम्युनिकेशनका कारण पहिलो गोल खान पुगेका थियौ तर सन्तोषले खेल बराबरीमा ल्याए’ उनले भने ‘खेलाडीहरूको इन्जुरीको समस्याका कारण चाडै खेलाडी परिवर्तनले अन्तिम समयमा दबाबमा पर्यौँ।’ यता, आयोजकका प्रशिक्षक दर्शन भक्तराज कलेक्सन टिमले अपेक्षा गरेभन्दा पनि राम्रो खेलेको बताए। ‘पाएको केही राम्रा अवसर सदुपयोग गर्न नसक्दा जितका लागि सडनडेथसम्म पुग्नुपर्यो’ उनले भने ‘खेलाडीको रिलिज क्लियरेन्स नहुँदा केही दबाब थियो। वर्क पर्मिट नभएकाले २ जना अफ्रिकन खेलाडी मैदान उर्तान नपाउँदा दबाब परेको थियो।’ आयोजक टिमलाई सेमिफाइनलसम्म पुर्याउन योगदान दिएका जुनियर ओङगुइने र जोर्डन जुनियर डे को वर्क पर्मिट नहुँदा खेल मैदानमा देखिएनन्।
शिशिर लेखी, पदम भट्टराई र मनिष थापासमेत इलामको टिममा देखिएनन्। शिशिर र पदम विग्रेड व्वाइज क्लबबाट आहा रारा गोल्डकपका लागि पोखरा गएका छन्। मनिष यस महिना ३ भन्दा बढी गोल्डकप प्रतियोगितामा सहभागिताका कारण टिममा राखिएको थिएन्। उपाधि भिडन्तका लागि आयोजकले लिग बिजेता मछिन्द्र क्लबसँग फागुन २४ गते प्रतिस्पर्धा गर्नेछ।
फेसबुकबाट तपाईको प्रतिक्रिया !